کوردژین : له‌ ده‌ست پێکدا ده‌مانه‌وێت بزانین کرمانج گه‌ردی کێیه‌ ؟
کرمانج گه‌ردی :من کرمانج طاهر گه‌ردی .. له‌ شاره‌ جوانه‌که‌ی قه‌لامو مناره‌ بۆ یه‌که‌م جار هه‌ناسه‌م هه‌لمژی .. ئه‌و شاره‌ش بوو فێری خۆشه‌ویستی کردم بۆ شیعر ..

کوردژین : که‌ی هه‌نگاوت ناوه‌ به‌ره‌و جیهانی شیعر ؟ چۆن ده‌ستت پێ کرد ؟ ئایا خۆت دۆزیوه‌ته‌وه‌ له‌ جیهانی شیعر ؟
کرمانج گه‌ردی : چه‌ند ساڵێک ئه‌بێت خولیای مه‌له‌ کردنم له‌ ده‌ریای شیعردا هه‌یه‌ ، سه‌ره‌تا به‌ خوێندنه‌وه‌ی شیعری شاعیرانی گه‌وره‌وه‌ ده‌ستم پێ کرد ، شیعر ئیمپراتۆریه‌تێکی گه‌وره‌یه‌ تا ئێستا نازانم له‌ کام کونجی ئه‌و ئیمپراتۆریه‌ته‌دام.

کوردژین : ده‌ڵێنشاعیر درۆزنه‌ ؟ ئایا ئه‌مه‌ راسته‌ ؟
کرمانج گه‌ردی :ئه‌گه‌ر شاعیر جوانی و به‌وه‌فایی و بێوه‌فایی کچ بنوسێته‌وه‌ یاخود په‌نجه‌کانی بۆ سروشت و دایک و نیشتیمان بکاته‌ ڕه‌نگ بۆ نووسینه‌وه‌ی له‌سه‌ر په‌ره‌ یه‌ک ئایا درۆزنه‌ ؟!! نه‌خێر شیعر په‌یامه‌ .. شاعیریش په‌یامبه‌ره‌ .. په‌یام به‌ریش راستگۆیه‌ ..

کوردژین : باسی دایک و نیشتیمانت کرد ، ئایا تا ئێستا هیچ شیعرێکت بۆ دایک و نیشتیمنان نووسیوه‌ ؟
کرماج گه‌ردی :مه‌خێر تا ئێستا نه‌م نووسیوه‌ ! چونکه‌ دایک و نیشتیمان زۆر له‌وه‌ گه‌وره‌ ترن که‌ من وه‌ک شیعر نووس شیعریان بۆ بنووسم ..

کوردژین : بۆ به‌خۆت ده‌ڵێی شیعر نووس بۆ ناڵێی شاعیر ؟
کرمانج گه‌ردی : من به‌ خۆم ناڵێم شاعیر چونکه‌ هێشتا زۆرم ماوه‌ ببم به‌ شاعیر ! شاعیر ده‌بێت جیهانێکی گه‌وره‌ و پان و به‌رینی هه‌بێت من هێشتا ماوه‌ ئه‌و جیهانه‌م هه‌بێت ..

کوردژین : لای کرمانج گه‌ردی شیعر واته‌ چی ؟ چۆن ده‌روانیته‌ شیعر ؟
کرمانج گه‌ردی : به‌ بروای من شیعر ئه‌و په‌یامه‌ پیرۆزه‌یه‌  که‌ هه‌موو مرۆڤێک ئاشنا و خولیای ده‌بێت ، شیعریش هه‌لقولاوی هه‌ست و خۆشه‌ویستی یاخود ده‌ربڕینی خۆشی و ناخۆشی و واقیعه‌یه‌ که‌ شاعیر تیایدا ده‌ژی.

کوردژین : نامیلکه‌یه‌کت  هه‌یه‌ له‌گه‌ل کاک موخلیس بلباس . ئه‌گه‌ر که‌مێک باسی ئه‌و نامیله‌که‌یه‌مان بۆ بکه‌یت ؟

کرمانج گه‌ردی : به‌ ڵێ نامیلکه‌یه‌کم بلاو کرده‌وه‌ له‌گه‌ل برای به‌ڕێزم کاک موخلیس بلباس به‌ ناوی ( ئه‌و فرمێسکانه‌وه‌ په‌شیمانمان ناکه‌نه‌وه‌ ) .. که‌ هه‌ریه‌که‌مان چه‌ند شیعرێکمان تیایدا بلاو کرده‌وه‌ ئه‌مه‌ش سه‌ره‌تایه‌کی باش بوو ، تاوه‌کو له‌ ریگای ئه‌م نامیلکه‌یه‌وه‌ خۆم به‌ جه‌ماوه‌ر بناسێنم. وه‌ له‌م مینبه‌ره‌ جوانه‌وه‌ ده‌مه‌وێت سوپاسی ئه‌و که‌سانه‌ بکه‌م که‌ یارمه‌تیان دام بۆ بلاو کردنه‌وه‌یئه‌م به‌رهه‌مه‌ به‌تایبه‌تی کاک راوێژ قه‌لادزه‌یی که‌ پێشه‌کیه‌که‌ی بۆ نووسین
وه‌ هه‌روه‌ها نه‌خشه‌ سازی و به‌رگیش کاک ئه‌بوبه‌کری مه‌لا عبدالله‌ وه‌ برای به‌ڕێزم کاک بۆتان ناله‌یی که‌ مۆنیڤی بۆ کردین .. وه‌ نابێ ئه‌وه‌ش له‌بیر بکه‌ین خوشکی به‌ڕێزم شیلان  به‌هاری پیتچنینی بۆ کردین..

کوردژین : ماوه‌یه‌که‌ دابراویت له‌ دونیای شیعردا ئایا ئه‌مه‌ بۆچی ده‌گه‌رێنیته‌وه‌ ؟
کرمانج گه‌ردی :پێـم باش بوو زیاتر بخوێنمه‌وه‌ تا زیاتره‌ شاره‌زا بم ! ئه‌وه‌ هۆکاری سه‌ره‌کی دابرانمه‌ ،، هه‌ندێک هۆکاری تری لاوه‌کیش هه‌یه‌ که‌ تایبه‌تیه‌ ..

کوردژین: کام شاعیر کاریگه‌ری هه‌بوو له‌سه‌ر به‌ڕێزتان ؟
کرمانج گه‌ردی : من شیعری هه‌ر شاعیرێکم خوێندبێته‌وه‌ کاریگه‌ری هه‌بووه‌ له‌سه‌رم چونکه‌ به‌ وردی تێکه‌لاو و ئاوێته‌ی شیعره‌کانیان ده‌بم ، به‌ڵام ئه‌وه‌ی زۆر ده‌یخوێنمه‌وه‌و کاریگه‌ری زۆری له‌سه‌ر دروست کردووم شیعره‌ پیرۆزه‌کانی حه‌زره‌تی نالی و گۆرانن .

کوردژین : جگه‌ له‌ شیعر رۆمان ده‌خوێنیته‌وه‌ ؟
کرمانج گه‌ردی : به‌ڵێ ،رۆمان ده‌خوێنمه‌وه‌ وه‌ به‌تایبه‌تی رۆمانه‌کانی نووسه‌ری گه‌وره‌ کاک به‌ختیار عه‌لی و وه‌ ئه‌و رۆمانانه‌ی که‌  له‌ فارسیه‌وه‌ وه‌رگێردراونه‌ته‌ سه‌ر زمانی دایک

کوردژین :ئایا ژیانی هاوسه‌ریت پێک هێناوه‌ ؟ به‌ خۆشه‌ویستی بوو یان ڕێککه‌وت ؟
کرمانج گه‌ردی : به‌ڵێ خێزاندارم ، له‌ ڕێگای ناسیاوی خێزانه‌که‌م هه‌لم بژارد ، هه‌رچه‌نده‌ به‌ خۆشه‌ویستی نه‌بوو به‌ڵام ئێستا دوو عاشق و خؤشه‌ویستی سه‌ختی یه‌کترین ! لێره‌وه‌ش به‌ خاتوونه‌که‌م ده‌ڵێم خۆشم ده‌وێیت .

کوردژین :هیچ شیعرێکت بۆ هاوسه‌ره‌که‌ت نووسیوه‌ ؟
کرمانج گه‌ردی : به‌ڵێ نووسیومه‌ ، به‌ڵا  هێشتا خۆم به‌ شه‌رمه‌زاری ئه‌زانم چونکه‌ شیعره‌کانم له‌و ئاسته‌دانین که‌ سۆز و خۆشه‌ویستیمی بۆ بدرکێنێت.

کوردژین : ماندوومان کردیت سوپاس بۆ ئه‌و ده‌رفه‌ته‌ی پێت داین ، دوا وته‌ت ؟
کرمانج گه‌ردی :به‌ خۆشحالیه‌وه‌ سوپاس بۆ ئوه‌ی خۆشه‌ویست، هیوای سه‌رکه‌وتن و ته‌مه‌ن درێژیتان بۆ ده‌خوازم بۆ ماڵپه‌ره‌که‌تان و ده‌سته‌ی به‌ڕێوه‌به‌رانی ئه‌م ماڵپه‌ره‌ جوانه‌، خوازیارم زیاتر خزمه‌تی ئه‌ده‌ب و رۆشنبیری و بواره‌ جیاجیاکان بکه‌ن سه‌رکه‌وتووبن.

ئێمه‌ش سوپاست ده‌که‌ین

دیمانه‌ : ڕێگا شیاو
تایبه‌ت به‌ کوردژین